- AS PROBAS REALIZARANSE DURANTE OS TRES DÍAS DESTA FEIRA DO TRANSPORTE DE VIAXEIROS POR ESTRADA, QUE SE CELEBRARÁ DO 16 AO 18 DE NOVEMBRO NO RECINTO FEIRA INTERNACIONAL DE GALICIA ABANCA (SILLEDA, PONTEVEDRA)
- OS GALARDÓNS DESTA COMPETICIÓN ENTREGARANSE NA ÚLTIMA XORNADA DO CERTAME
Silleda, 13 de setembro de 2023.- A III Feira do Transporte de Viaxeiros por Estrada, ExpoBus Iberia 2023, acaba de convocar a tamén terceira edición do Premio ao Mellor Condutor-Condutora de Autocares de España, cuxas probas se levarán a cabo coincidindo co salón, do 16 ao 18 de novembro.
A este concurso, patrocinado pola compañía MAN, poden presentarse condutores en activo ou en réxime de desemprego con nacionalidade española que se dediquen actualmente a esta actividade. Os candidatos deben realizar un exame de coñecementos, tipo test, e diversas probas de habilidade nun circuíto deseñado especialmente para iso e situado nas instalacións do recinto Feira Internacional de Galicia ABANCA, onde se celebra ExpoBus Iberia.
Os vehículos nos que se realizarán as probas serán dous autocares de doce metros de lonxitude modelo Lion´s Coach da marca MAN, equipados coas últimas tecnoloxías do mercado. Os técnicos e formadores da empresa TECE encargaranse do deseño do circuíto, realización das probas e valoración de candidatos.
Cada condutor terá a oportunidade de realizar un pre-exame -sen puntuar- antes da proba definitiva, co fin de que coñezan de antemán o circuíto, as probas e o propio vehículo. Previamente á proba de condución realizarase a avaliación teórica tipo test.
Todos os condutores e condutoras que queiran optar a este premio poden obter toda a información na web www.expobuisiberia.com e solicitar a súa candidatura en premiomejorconductor@expobusiberia.com indicando “Inscrición premio mellor condutor/a” ata o 10 de novembro. O equipo desta competición poñerase en contacto con eles para xestionar a súa inscrición, ademais de hora e día de participación.
Entrega de premios
Os premios entregaranse nunha cerimonia oficial en ExpoBus Iberia o sábado 18 de novembro, ás 14.00 horas. O gañador ou gañadora será o condutor con mellor puntuación na suma de todas as probas realizadas.
